Shayxontohur tumanida bir-biriga tutash boʻlgan uylarda yongʻin sodir boʻldi. Bu haqida FVV xabar berdi.

Maʼlum qilinishicha, bugun 5-aprel soat 08:16 da Toshkent shahar Shayxontohur tumani «Yangi Kamolon» MFY Yangiobod koʻchasida bir-biriga tutash qurilgan 4 ta xonadonda yongʻin sodir boʻlayotgani toʻgʻrisida shahar FVBga xabar kelib tushgan.

Shunga koʻra, 6 ta yongʻin-qutqaruv ekipaji soat 08:23 da hodisa joyiga yetib borib, yongʻin soat 08:52 da qurshab olingan va soat 09:11 da bartaraf etilgan. Yongʻin natijasida xonadonlarning taxminan 400 kv.m. maydonda tomi va shift qismi yongan. Hodisa oqibatida tan jarohati olgan va halok boʻlganlar yoʻq.

Hozirda yongʻin sababi hamda keltirilgan moddiy zarar miqdori aniqlanmoqda.