Ijtimoiy tarmoqlarda Davlat test markazi tomonidan yangi test topshiriqlari toʻplamlari nashr etilgani haqida xabarlar tarqaldi. DTM axborot xizmati holatga munosabat bildirdi.

Maʼlum qilinishicha, Davlat test markazi “Davr press” nashriyoti bilan hamkorlikda 2019- va 2020-yillarda umumtaʼlim fanlaridan test topshiriqlari toʻplamlari chop etgan. Ammo 2021-yilda test topshiriqlari toʻplamlari chop etilmagan.

Abituriyentlar 2021-2022-oʻquv yili uchun oliy taʼlim muassasalarining bakalavriat taʼlim yoʻnalishlariga kirish test sinovlarida foydalanilgan test topshiriqlari bilan Davlat test markazining e-DTM tizimi (@e_dtm_bot) orqali onlayn tarzda va my.dtm.uz sayti orqali diagnostik test materiallariga buyurtma bergan holda (https://my.dtm.uz/diagnostics/) tanishishlari hamda oʻz bilimlarini sinab koʻrishlari mumkin.

Shuningdek, DTM direktori oʻrinbosari Sardor Rajabov bu kitoblarni chiqarayotganlarga qonuniy chora koʻrilishini maʼlum qildi.