Hukumat qarori bilan Vazirlar Mahkamasining “Umumiy oʻrta taʼlim muassasalarining oʻrnak koʻrsatgan xodimlarini moddiy ragʻbatlantirish tartibini takomillashtirish toʻgʻrisida” 2019-yil 30-sentyabrdagi 823-son qaroriga oʻzgartirish va qoʻshimchalar kiritildi.

Kiritilgan qoʻshimchalarga koʻra, maktablarning pedagog xodimlari xalqaro tadqiqotlarga oʻquvchilarni tayyorlab borish ishlariga munosib hissa qoʻshgan taqdirda bazaviy tarif stavkasiga nisbatan har oylik 100 foiz ustama qoʻshiladi. Ilgari ushbu ustama pedagog xodimlar faoliyati davomida yuqori natijalar koʻrsatgan taqdirda toʻlangan.

100 foizlik ustama olishga daʼvogar pedagog xodimlarning mashgʻulot olib boradigan fanlari boʻyicha oʻquvchilarining bilimlari xalqaro baholash dasturlari integratsiya qilingan nazorat materiallari asosida baholanadi.

Bunda nazorat materiallari Taʼlim sifatini baholash boʻyicha xalqaro tadqiqotlarni amalga oshirish milliy markazi bilan hamkorlikda Respublika taʼlim markazi tomonidan tayyorlanadi.

Shuningdek, oʻquvchilari xalqaro fan olimpiadalarida gʻoliblikni qoʻlga kiritganda maktablarning rahbar xodimlariga va soatbay ishlovchi oʻqituvchilarga ham oylik ustamalar belgilanadi.