Vodiy viloyatlaridagi avtomobillarga gaz toʻldirish kompressor stansiyalari 18-mart soat 18:00 dan 19-mart soat 06:00 gacha faoliyatini toʻxtatadi, deya xabar berdi “Oʻztransgaz” matbuot xizmati.

“Respublikada kuzatilayotgan sovuq va nam ob-havo sharoitida aholi, isteʼmolchilar va ijtimoiy soha obyektlari, strategik ahamiyatga ega boʻlgan korxonalarni uzluksiz va barqaror tabiiy gaz bilan taʼminlash birlamchi vazifa hisoblanadi”, — deyiladi xabarda.

Shu bois, kompaniyaning yozishicha, respublikadagi tabiiy gaz isteʼmolchilarining salmoqli qismini tashkil etuvchi Fargʻona vodiysidagi aholi xonadonlari, ijtimoiy soha va strategik ahamiyatga ega obyektlarni tabiiy gaz bilan barqaror taʼminlashga qaror qilingan.