Oʻzbekistonda ilk bor joriy etilayotgan bu mexanizm bugun Oliy Majlis Qonunchilik palatasi deputatlari tomonidan qabul qilingan “Davlat fuqarolik xizmati toʻgʻrisida”gi qonunda nazarda tutilgan.

Qonunga koʻra, barcha darajadagi davlat fuqarolik xizmatchilari uchun egallab turgan lavozimi, ish staji va malaka oshirish kurslarining natijalariga qarab malaka darajalari beriladi.

Endilikda huquqni muhofaza qiluvchi organlar va maxsus xizmat xodimlari kabi davlat fuqarolik xizmatchilari ham malaka darajalariga ega boʻladi.

Malaka darajalari berishdan maqsad — davlat fuqarolik xizmatchilari mehnatini munosib baholash, ular oʻrtasida oʻzaro sogʻlom raqobat muhitini shakllantirish, moddiy ragʻbatlantirish va tizimli ravishda kasbiy malakasini rivojlantirishga qaratilgan.