Ukrainadan Polshaga evakuatsiya qilingan yana 258 nafar Oʻzbekiston fuqarosi mamlakatimizga olib kelindi. Bu haqida Tashqi ishlar vazirligi rasmiy vakili xabar bergan.

Taʼkidlanishicha, Polshaning Katovitse shahridan hamyurtlarimizni olib kelgan ikkinchi maxsus samolyot 1-mart kuni soat 9:15 da poytaxt Toshkentga kelib qoʻngan.

Ayni paytgacha Ukrainadan jami 509 nafar Oʻzbekiston fuqarosi vatanga qaytarildi.
Qayd etilishicha, hozir “Karchova” nazorat-oʻtish punktidagi toʻplanish joyida boʻlib turgan 650 dan ziyod fuqarolarimiz uchun barcha zarur sharoit yaratilgan. Ularni olib kelish uchun yana qator evakuatsion reyslar tashkil etish koʻzda tutilmoqda.

Oʻzbekistonning Polshadagi elchixonasi xodimlari fuqarolarning aeroportda boʻlib turishlarini muvofiqlashtirmoqda. Elchixonada uzluksiz ishlaydigan tezkor shtab tashkil etilgan.