Samarqand shahrida 23-fevral kuni lift va u yerda oʻrnatilgan kuzatuv kamerasiga tupurgan shaxsga jazo tayinlandi. Bu haqida Samarqand viloyat Ichki ishlar boshqarmasi xabar qildi.

Qayd etilishicha, shu kuni Navoiy viloyati Xatirchi tumanida yashovchi X.J. (1993-yilda tugʻilgan) mast holatda Samarqand shahar Qorasuv mavzesidagi 83-koʻp qavatli uyning liftiga va u yerda oʻrnatilgan kuzatuv kamerasiga tupurib, jamiyatda oʻrnatilgan yurish-turish qoidalarini qasddan buzgan.

Sodir etgan qoidabuzarligi uchun unga nisbatan Jinoyat ishlari boʻyicha Samarqand shahar sudi tomonidan 10 sutka maʼmuriy qamoq jazosi tayinlangan.