Oʻzbekistonda 2022-yil 1-yanvardan amaliyotga joriy etilgan keshbek tizimi orqali 86,7 ming nafar isteʼmolchiga 15,1 milliard soʻm keshbek toʻlab berildi. Bu haqida Davlat soliq qoʻmitasi xabar qildi.

Qayd etilishicha, oʻtgan oy mobaynida 276 ming 302 ta xarid chekiga hisoblangan yana 5,4 milliard soʻmdan ortiq keshbek toʻlanmagan. Bunga 17 ming 517 ta tadbirkorlik subyektlarining soliq hisobotlaridagi kamchiliklar sabab boʻlgan:

• 2 ming 763 ta tadbirkor (hisoblangan keshbek 2,6 milliard soʻm) hisobotlarida chek maʼlumotlari toʻliq aks ettirilmagan;
• 12 ming 406 ta tadbirkor (hisoblangan keshbek 1,4 milliard soʻm) umuman hisobot topshirmagan;
• 2 ming 348 ta tadbirkorning 1 million soʻmdan yuqori soliq qarzi mavjud (hisoblangan keshbek 1,4 milliard soʻm).

«Tadbirkorlik subyektlari tomonidan soliq hisobotlari topshirilishi, kamchiliklar tuzatilishi hamda ularning qarzdorligi kamayishi boʻyicha kunlik oʻzgarishlar real vaqt rejimida inobatga olinib, hisoblangan keshbek summasi tasdiqlanadi», deyiladi xabarda.