Mamlakatimiz mustaqilligining 30 yilligi munosabati bilan Singapurda istiqomat qilayotgan vatandoshimiz, «Credit Agricole» banki xodimi Nurshod Bahromov yurtdoshlarimizga bayram tabrigi yo‘lladi. Bu haqda «Dunyo» AA xabar berdi.

— Mustaqillik, xalqimizga o‘zligini anglash, tarixini chuqur o‘rganish va bilish, madaniy va ma’naviy merosdan bahramand bo‘lish imkoniyatini taqdim etdi. O‘tgan 30 yil davomida mamlakatimiz tarixiy rivojlanish davrini boshdan kechirdi. Turli sohalarda erishgan muvaffaqiyatlarimizning salmog‘i juda katta. Ular xalqimiz farovonligini ta’minlash uchun xizmat qilmoqda. O‘zbekiston iqtisodiyotidagi  ko‘rsatkichlar ham  yildan yilga yaxshilanib bormoqda.

Turli sohalarda bo‘layotgan yangilanishlar, jumladan, ta’lim sohasidagi islohotlar, Jahon savdo tashkilotiga a’zo bo‘lish yo‘lidagi sa’y-harakatlar, so‘z erkinligini ta’minlashga qaratilgan vazifalar  hech birimizni befarq qoldirmaydi. Biz, yosh avlod vakillari ijtimoiy-iqtisodiy sohalardagi muvaffaqiyatlarimiz bundan keyin ham bardavom bo‘lishiga ishonamiz.

Yurtimizdan tinchlik va osoyishtalik arimasin. Barchangizga  istiqlolimizning 30 yillik ayyomi muborak bo'lsin! — deydi vatandoshimiz.