Shavkat Mirziyoyev huzurida 2022-yilda bojxona maʼmurchiligini yanada takomillashtirish va sohani korrupsiyadan holi tizimga aylantirish boʻyicha ustuvor vazifalar yuzasidan yigʻilish oʻtkazilmoqda.

Yigʻilishda, shuningdek, xodimlarning ijtimoiy himoyasini kuchaytirish chora-tadbirlari belgilab berildi:

- Olot, Guliston, Termiz va boshqa hududlardagi olis postlarda ishlaydigan xodimlar uchun xizmat uylari barpo etiladi;

- joriy yilda uy-joyga ehtiyoji bor 100 nafar va har yili kamida yana shunchadan xodim imtiyozli ipoteka bilan taʼminlanadi;

- bojxona xodimlari va ularning farzandlari uchun oliy oʻquv yurtlariga kirishda alohida kvota ajratiladi.

Yana bir masala – bugungi kunda bojxona organlarida ayollarning ulushi bor-yoʻgʻi 8 foizni tashkil etadi.

“Sohada adolat, halollik va tartibni joriy qilishni xohlar ekanmiz, tizimga ayol xodimlarni jalb qilish uchun barcha zarur shart-sharoitlarni yaratishimiz shart”, dedi davlatimiz rahbari.

Shu munosabat bilan kelgusi ikki yilda ayollar ulushini kamida 2 barobarga oshirish boʻyicha ishlarni hozirdan boshlash vazifasi qoʻyildi.