Oilaviy muhitga yaqin shakldagi yangi ijtimoiy xizmatlar koʻrsatiladi. Bu haqda Adliya vazirligi maʼlum qildi.

“Ruhiy holati buzilgan nogironligi boʻlgan shaxslarga ijtimoiy xizmat koʻrsatish tizimini tubdan takomillashtirish boʻyicha qoʻshimcha chora-tadbirlar toʻgʻrisida”gi Prezident Farmoni bilan moʻtadil, ogʻir va chuqur darajadagi aqliy zaiflik yoki demensiya tashxisi qoʻyilgan I va II guruh nogironligi boʻlgan shaxslar uchun oilaviy muhitga yaqin shakldagi quyidagi:

- 2026-yil 1-iyungacha “Yangi kun” kunduzgi qatnov asosida qarab turish;

- 2026-yil 1-sentyabrgacha uy sharoitida qarab turish;

- 2026-yil 1-oktyabrgacha kichik hajmli “Madad” uyi;

- 2026-yil 1-noyabrga qadar “Ijtimoiy taʼtil” qisqa muddatli joylashtirish kabi yangi ijtimoiy xizmatlarni koʻrsatish bosqichma-bosqich joriy etiladi.

Ushbu xizmat kichik hajmli “Madad” uylarida tashkil qilinib, ijtimoiy reyestrga kiritilgan ruhiy holati buzilgan I va II guruh nogironligi boʻlgan shaxslarga ularning qonuniy vakili bilan imzolanadigan shartnomaga muvofiq 1-yilda 1 marotaba shartnomada belgilangan muddatda, biroq koʻpi bilan 2 hafta davomida koʻrsatiladi.

2026-yil 1-iyundan tuman (shahar) hokimliklari huzuridagi vasiylik va homiylik boʻyicha komissiyalar tarkibiga “Inson” markazlari xodimlari kiritiladi.

2026-yil 1-iyundan ruhiy holati buzilgan shaxslarga vasiy yoki homiy sifatida tayinlangan shaxslarning vasiylik yoki homiylikdagi shaxslar oldidagi majburiyatlarining bajarilishi “Inson” markazi tomonidan monitoring qilib boriladi.