Turkiya Prezidenti Administratsiyasi kommunikatsiyalar boshqarmasi mamlakat milliy va xalqaro nomining “Türkiye” sifatida ishlatilishini xalqaro mediada yanada samaraliroq targʻib etish maqsadida “Hello Türkiye" loyihasiga start berdi.

Maʼlum qilinishicha, loyiha chet elliklarning ijtimoiy tarmoqlarda mamlakat nomini turli tillarda har xil ishlatilishiga yoʻl qoʻymaslik orqali “Türkiye” soʻzini targʻib etishni maqsad qilgan.

Kommunikatsiyalar boshqarmasi boshligʻi Fahrettin Altunga koʻra, “Türkiye” brendini mustahkamlash uchun Turkiya brend ofisi (Turkiye Marka Ofisi) tashkil etiladi.

“Hello Türkiye” loyihasi doirasida targʻibot videosi tayyorlangan. Xorijlik sayyohlar oʻz talaffuzida ushbu soʻzlarni aytgani aks etgan lavha #helloTürkiye heshtegi bilan ijtimoiy tarmoqlarda keng yoyilmoqda.