Huquqshunos Muhammadamin Karimjonov “Farzand tug‘ilganda otaga 5 kunlik ta’til beriladimi?” mazmunidagi savolga qonunchilikka tayanib javob berdi.

Uning so‘zlariga ko‘ra, erkaklar farzandli bo‘lganda, turmush o‘rtog‘iga yordam berish va boshqa farzandlariga qarab turishi uchun qisqa muddatli ta’tilga chiqishi bilan bog‘liq me’yorni qonunchilikka kiritish taklif etilgan edi. Hozircha bunday norma mehnat qonunchiligiga kiritilmadi.

Biroq bu “erkaklarga umuman kafolat yo‘q ekan-da” degan xulosani bermasligi kerak. Chunki Mehnat qonunchiligida erkaklar ham “esdan chiqarilmagan”.

Jumladan, Mehnat kodeksining 13-moddasiga ko‘ra, mehnat haqidagi boshqa huquqiy hujjatlarda xodimlar uchun mehnat to‘g‘risidagi qonunchilikda belgilanganiga nisbatan qo‘shimcha huquqlar va kafolatlar nazarda tutilishi mumkin.

Kodeksning 238-moddasida esa jamoa kelishuvlarida yoxud jamoa shartnomasida yoki mehnat haqidagi boshqa huquqiy hujjatlarda quyidagilar nazarda tutilishi mumkinligi aytiladi:

▪️ xodimlarga qonunchilikda belgilanmagan boshqa ijtimoiy ta’tillarni berish (nikoh tuzilganligi munosabati bilan, bola tug‘ilishi munosabati bilan bolaning otasiga, xodimning yaqin qarindoshi vafot etganligi munosabati bilan va boshqalar);

▪️ ijtimoiy ta’tillar davomiyligini ularning qonunchilikda belgilangan davomiyligiga nisbatan ko‘paytirish.

Bundan tashqari, 400-moddada ishlaydigan erkaklarga xotinining homiladorlik va tug‘ish ta’tili davrida o‘z xohishiga ko‘ra yillik mehnat ta’tili (birinchi ish yili uchun — ishlab berilgan vaqtdan qat’i nazar; keyingi yillarda — ta’tillar berish jadvalidan qat’i nazar) berilishi belgilab qo‘yilgan.