Otasi bilan tez-tez ziddiyatga borgan va tengdoshlari bilan ko‘p nizolashgan o‘smirlarda biologik qarish tezlashishi mumkin. Virginiya universiteti olimlari ana shunday xulosaga kelishdi.

Xabarda aytilishicha, 17 yillik kuzatuvlar davomida 123 nafar o‘smirda tadqiqot olib borilgan Yakunda 13-20 yoshida otasi bilan keskin munosabatda bo‘lgan va do‘stlariga nisbatan agressiv kayfiyatda bo‘lgan o‘smirlarda 30 yoshga borib biologik qarish jarayoni ko‘proq yuz berishi aniqlangan.

Organizm holatini baholashda  xolesterin darajasi, qon bosimi, qondagi qand miqdori, oqsillarni o‘z ichiga olgan ko‘rsatkichlardan foydalangan olimlar tekshiruvlarda aynan ziddiyatlar, ayniqsa, otalar bilan kelishmovchiliklar qarishni tezlashtiradi degan xulosaga kelgan.

Tadqiqot muallifi professor Jozef Allenning so‘zlariga ko‘ra, ota bilan ziddiyat o‘smirlarda stressni oshiradi hamda yurak-qontomir va immun tizimlariga salbiy ta’sir ko‘rsatadi.

Olimlar o‘smirlik davridagi ziddiyatli munosabatlar nafaqat ruhiy muammo, balki uzoq umr ko‘rishga salbiy ta’sir ko‘rsatuvchi omil ekanligini ta’kidlamoqda. Ularning so‘zlariga ko‘ra, erta qarishning oldini olishda oila va atrofda do‘stona muhitning yaratilishi juda muhim hisoblanadi.