Anonim milliarder 2-yil oldin besh kishining hayotiga zomin boʻlgan OceanGate falokatidan keyin ilk bor “Titanik”ka shoʻngʻish uchun 10 million dollar toʻlaydi. Bu haqda New York Post manbalarga tayanib xabar berdi.

“Bir necha haftadan keyin kimdir “Titanik” tubiga shoʻngʻiydi. Bu inson milliarder ekanini ayta olaman. U yerga sayohat 10 million dollarga tushadi. Siz uning ismini bilsangiz kerak”, deyiladi manbalardan birida.

Maʼlumot uchun, 2023-yil 18-iyun kuni Amerikaning OceanGate kompaniyasiga tegishli “Titan” batiskafi, 1912-yilda Atlantika okeanida choʻkib ketgan Titanik layneri vayronalariga shoʻngʻish vaqtida halokatga uchragan va bortdagi barcha, yaʼni 2 nafar ekipaj aʼzosi va 3 nafar yoʻlovchining barchasi halok boʻlgan.