Mana 30 yildirki 14-yanvar —  Vatan himoyachilari kuni  mamlakatimizda katta tantana bilan nishonlab kelinadi. Bugun Respublika Ma’naviyat va ma’rifat markazi hamda O‘zbekiston Respublikasi  Mudofaa vazirligi hamkorligida Toifalangan ob’ektlarni qo‘riqlash qo‘mondonligida O‘zbekiston Respublikasi Prezidentining 2021 yil 22 noyabrdagi “O‘zbekiston Respublikasi Qurolli kuchlari tashkil etilganligining 30 yilligi hamda Vatan himoyachilari kunini nishonlashga tayyorgarlik ko‘rish va o‘tkazish  chora-tadbirlari to‘g‘risida”gi farmoyishida belgilangan vazifalar ijrosi  yuzasidan “Vatan himoyasi — muqaddas burch!” shiori ostida madaniy-ma’rifiy tadbir o‘tkazildi.

Tadbirda   Mudofaa vazirligi huzuridagi Jamoatchilik kengashi a’zosi Bahodir Umurzoqov hamda  Respublika Ma’naviyat va ma’rifat markazi bo‘lim boshlig‘i Maxfirat Zikirovalar so‘zga chiqib, ozod O‘zbekistonimiz farovonligi va kun sayin rivojlanib, taraqqiy etishi yurtimizdagi  tinchlik va barqarorlik tufayli ekanini  ta’kidlab o‘tishdi. Unda  ishtirok etgan   O‘zbekiston xalq artisti Gavhar Zokirova va O‘zbekiston Davlat drama teatri aktrisasi Munojat Teshaboevalar Vatanni madh etuvchi  she’rlar hamda sahna asarlaridan parchalar o‘qishdi. “Lazgi” ansamblining xushovoz xonandasi Xurshid Sobirov va Muqimiy nomidagi O‘zbekiston davlat  musiqali  teatri aktyori Baxtiyor Ahmedovlarning diltortar  qo‘shiqlari kechaga  o‘zgacha fayz bag‘ishladi.