Toshkent shahrida istiqomat qiluvchi fuqaro oʻz uyiga shu kunga qadar 522-marta tez yordam chaqirgani maʼlum qilindi. Bu haqida OAV xodimlari uchun poytaxtdagi tibbiyot muassasalariga uyushtirilgan press-tur davomida Tez tibbiy yordam Call-markaz boʻlimi mudiri Nasiba Mahmudova aytib oʻtgan.

“Yashnobod tumanining «Mumtoz” mahallasida yashovchi ayol shu kungacha 522 marotaba tez tibbiy yordamga murojaat qilgan. U har kuni 2-3 bor chaqiriqni amalga oshiradi. Baʼzi bemorlarga tez tibbiy yordam muhim holatlardagina chaqirilishi kerakligini tushuntirsangiz, ular bizning faoliyatimizdan norozi boʻladi», – degan Nasiba Mahmudova.

Biroz avval Sogʻliqni saqlash vazirligi yil boshidan 1-dekabrga qadar “Tez yordam” xizmati orqali 11 milliondan ortiq bemorga birinchi tibbiy yordam koʻrsatilgani, biroq, 90 foizdan ziyod bemorlar aslida “103” yordamiga muhtoj emasligi haqida maʼlum qilgandi.