Dunyoning eng boy insoni Ilon Mask oʻzining smartfonini ishlab chiqarishi mumkinmi? Milliarderning taʼkidlashicha, hozircha Teslaning boʻlgʻusi dasturlarida yangi smartfon yaratish rejasi yoʻq, biroq qachonki Apple va Google oʻz platformalarida senzuraga qoʻl ursa, Mask ana shu vaqtdan boshlab oʻz mahsulotini yaratishni boshlaydi.

“Agar bu kompaniyalar ilovalarni senzura qilish yoki salbiy yoʻl bilan “darvoza” boʻlish kabi yomon ishlarni boshlasa, menimcha, biz oʻz telefonimizni chiqarishimiz mumkin”, deydi u.

Mutaxassislarning taʼkidlashicha, Mask bu yoʻnalishda jadal davom etishi amrimahol. U mazkur rejadan voz kechishi ham ehtimoldan holi emas. Chunki koʻpgina taniqli kompaniyalar Android va iOS platformalari bilan raqobat qilishda yengilgan. Masalan, Amazon 2014-yilda Fire Phone qurilmasini yaratgan edi, biroq mahsulot bir necha sabablarga koʻra raqobatbardosh boʻla olmadi.

Microsoft'ning Windows Phone'ni esa ilova ishlab chiquvchilar tomonidan qoʻllab-quvvatlanmadi. Oqibatda esa mahsulotning bozori kasod boʻldi.

Shunday boʻlsa-da, Mask bu borada Teslaʼning imkoniyatlari boshqalarnikidan ancha yuqoriligini urgʻulagan.

Taʼkidlash lozim, Maskning oʻz Teslafonini yaratishi, hatto bu qurilmaning nomi “Model Pi” boʻlishi haqidagi mish-mishlar hozirgacha dunyo aholisini qiziqtirib kelmoqda. Ammo milliarderning oʻzi bu shunchaki choʻpchak ekanini tasdiqladi.