Abduqodir Husanovga ayni paytda Yevropaning top klublaridan qiziqishlar boʻlmoqda.

Jumladan yaqinda tarqalgan xabarlarga koʻra, “Tottenhem” va “Nyukasl” klublari (Bilamizki, bu ikki jamoa ham jahonning eng kuchli chempionati boʻlgan Angliya Premier ligasiga tegishli) oʻzbekistonlik futbolchini oʻz tarkibiga qoʻshib olmoqchi. Ular qishki transfer oynasida Husanovni 30 mln funtga sotib olish mumkin deb oʻylamoqda. “Lans” esa 20 yoshli Abduqodir Husanovni qishdayoq 25 mln funtga sotishi mumkin.

Shuningdek, yana bir jahonning mashhur klubi boʻlmish PSJ ham Husanovga xaridor. Klub oʻzbek yigitini braziliyalik himoyachi Markinosga munosib oʻrinbosar sifatida koʻradi. Hozirda klub rasmiylari Husanovning atrofida boʻlayotgan voqealarni diqqat bilan kuzatmoqda.

30-oktyabrda tarqalgan xabarlarga eʼtibor berilsa, Husanov “Manchester Yunayted”ning ham transfer rejalariga kiritilgan boʻlishi mumkin.

ʼ“Manchester Yunayted” bir yildan buyon Abduqodir Husanovni kuzatmoqda. Ingliz klubi futbolchining agentlari bilan muntazam aloqada boʻlib turishibdi”, deb yozgan edi Championat.asia sayti bosh muharriri Narzulla Saydullayev.

Maʼlumot uchun, Husanov 2004-yil 29-fevral kuni tugʻilgan. U „Bunyodkor« klubi tarbiyalanuvchisi boʻlib, ushbu klubning 18 yoshgacha boʻlgan yoshlar toifasida oʻynagan.

2022-yil mart oyida u “Energetik-BDU” klubiga koʻchib oʻtgan. 2023-yilning 24-iyulida Fransiyaning “Lans” jamoasi bilan 4-yillik shartnoma tuzgan.

Abduqodir Husanov joriy yilning noyabr oyida Fransiya chempionatida oyning eng yaxshi yosh futbolchisi deb topilgan.