Oʻzbekiston Respublikasi Madaniyat vazirligi “Humo Arena“ kompleksida boʻlib oʻtishi eʼlon qilingan «Tik Tok Fest” shou-konsert dasturi yuzasidan vazirlikka qaratilgan fikr-mulohazalarga rasmiy munosabat bildirdi.

Qayd etilishicha, bu kabi shou-konsert tomoshalarini tashkil etish Madaniyat vazirligi tomonidan emas, xususiy tadbirkorlar tomonidan amalga oshiriladi.

Oʻzbekiston Respublikasi Prezidentining PF- 6044-son Farmoni 2-ilovasi 32-bandiga muvofiq, konsert-tomosha tadbiriga bir martalik ruxsatnoma berish vakolatli boʻlgan — Ichki ishlar vazirligi, Mahalliy ijroiya hokimiyati organlari tomonidan amalga oshiriladi. Shu asosda, konsert-tomoshalarning saviyasi, mazmun-mohiyati, gʻoyasini tahlil qilish, tomosha boʻyicha yakuniy xulosalar berish ham Mahalliy ijroiya hokimligi huzurida tashkil etilgan tuzilmaning vazifasi hisoblanadi. Shu bois, Madaniyat vazirligi «Tik Tok Fest" shou-konserti yuzasidan barcha savol va mulohazalarni yuqorida keltirib oʻtilgan vakolatli mutassaddi organlarga yoʻllashni tavsiya qilgan.

 “Madaniyat vazirligi “Tik Tok Fest” shou-konsertini maʼnaviy jihatdan yoshlar ongiga, dunyoqarashiga salbiy taʼsir etadi, deb hisoblaydi. Oʻylaymizki, bu kabi ommaviy tadbirlarni tashkil etayotgan mutasaddilar ana shu jihatlarni hisobga olib, bu masalaga jiddiy yondashadi”, deyiladi munosabatda.