20-oktabr kuni Oʻzbekiston milliy Akademik drama teatrida yozuvchi Usmon Azim qalamiga mansub “Kunduzsiz kechalar” pyesasi asosidagi spektaklning 800-namoyishi boʻlib oʻtdi.

Namoyishdan soʻng Respublika Maʼnaviyat va maʼrifat markazining “Maʼrifat” targʻibotchilar jamiyati tomonidan Oʻzbek milliy akademik drama teatrida 800-marta sahnalashtirilgan spektakl ijodkorlari taqdirlandi.

“Kunduzsiz kechalar” pyesasi xalqimizning sevimli yozuvchisi Abdulhamid Sulaymon oʻgʻli Choʻlponning achchiq taqdiri, qatagʻon yillarining tahlikali damlari hamda haqiqat, adolat uchun kurashgan yozuvchining fojiasi haqida hikoya qiladi. Oʻz jonini saqlash uchun sotqinlikdan ham toymaydigan odamlarning qiyofasi ham spektaklda koʻrsatilgan.

Mazkur spektaklning sahnalashtiruvchi rejissyori Valixon Umarov, sahnalashtiruvchi rassomi esa Oʻzbekiston Respublikasi sanʼat arbobi Baxtiyor Toʻrayevdir.