15-oktabr kuni Isroilning Xolon texnologiya institutida tahsil olayotgan oʻzbekistonlik talabalar Toshkentga uchib ketdi. Bu haqda Oʻzbekistonning Isroildagi elchixonasi xabar qildi.

Xabarga koʻra, Tel-Aviv janubidagi Xolon shahrida joylashgan institut bilan talabalarning Oʻzbekistonda oʻqishini onlayn formatda davom ettirish boʻyicha kelishuvga erishilgan.

Elchixona talabalarni vatanga joʻnatishda Xolon texnologiya instituti, Oʻzbekiston Milliy universiteti, Buxoro va Samarqand davlat universitetlari, shuningdek, Uzbekistan Airways vakolatxonasining yordamini alohida qayd etib oʻtgan.