Toshkent shahri Uchtepa tumanida tuproq oʻpirilishi oqibatida 5 kishi jabrlandi. Holat yuzasidan jinoyat ishi qoʻzgʻatildi.

Beshqayragʻoch koʻchasida kotlovan qazish ishlari olib borilayotganida “Shafoat” MCHJ xodimlarini tuproq bosib qolgan. Oqibatda, 2 nafar ishchi xodim hayotdan koʻz yumgan, 1 nafar xodim shifoxonada, 2 nafar ishchining ahvoli qoniqarli baholanmoqda. Uchtepa tumani Ichki ishlar boʻlimi va boshqa huquqni muhofaza etuvchi idoralar tomonidan surishtiruv ishlari olib borilmoqda.

Holat yuzasidan 11-oktabr kuni Toshkent shahar prokuraturasi tomonidan Jinoyat kodeksining 257-moddasi (Mehnatni muhofaza qilish qoidalarini buzish) va 258-moddasi (Togʻ-kon, qurilish yoki portlatish ishlari xavfsizligi qoidalarini buzish) bilan jinoyat ishi qoʻzgʻatilgan. Hozirda dastlabki tergov harakatlari olib borilmoqda.