“UzAuto Motors” kompaniyasi “Cobalt”, “Lacetti”, “Damas” va “Labo” avtomobillari uchun kontraktatsiyani ochmoqda. Bu haqda kompaniya matbuot xizmati xabar berdi.

Maʼlum qilinishicha, 18-sentabr kuni sotuvga chiqarilayotgan shartnomalar soni 20 mingdan ortiq. Kompaniya rasmiy saytida koʻrsatilgan komplektatsiya va ranglardagi avtomobillar uchun shartnoma tuzish mumkin. Buning uchun “Chevrolet”ning vakolatli dilerlik markazlariga murojaat qilish mumkin.

Avgust oyi boshida “UzAuto Motors” kompaniyasi mazkur avtomobillarning yangilangan komplektatsiyalari uchun shartnomalar tuzishni boshlagandi. 4−5-avgust kunlari “Cobalt”, “Lacetti” va “Damas” uchun 50 mingdan ortiq shartnoma imzolandi.

Shartnoma tuzish ochilganidan buyon, deyarli 51 mingga yaqin “Lacetti”, “Cobalt”, “Damas” hamda “Labo” avtomobillari uchun shartnomalarga toʻlov qilingan. Avtomobillar joriy yilda oʻz egalariga topshirilishi hamda keyinchalik bu muddat 3 oydan oshmasligi qayd etilgandi.

Kompaniyaning qayd etishicha, tuzilgan shartnomalar boʻyicha dilerlik markazlari xaridorlarga “Cobalt”, “Lacetti”, “Damas” va “Labo” avtomobillarini muddatidan oldin yetkazib berishni boshlagan.

Qayd etish kerak, agar bir shaxs nomiga yiliga bir xil model uchun 2 tadan ortiq avtomobil xarid qilinsa, shartnoma sharti koʻra, avtomobillarni yetkazib berish muddati uzaytiriladi. Shu sabab, xaridorlardan shartnomani imzolashdan oldin uning barcha bandlari bilan toʻliq tanishib chiqishlari soʻralmoqda.