Oʻzbekiston Oliy sudi respublika boʻylab Jinoyat ishlari boʻyicha sudlarning 2018–2022-yillar hamda 2023-yil birinchi choragi faoliyatiga doir ayrim koʻrsatkichlarni ochiqladi.

Maʼlum boʻlishicha, 2018-yil boshidan 2023-yil mart oyiga qadar jami 11 kishiga Oʻzbekiston Jinoyat kodeksidagi eng ogʻir jazo – umrbod ozodlikdan mahrum etish jazosi tayinlangan. Hududlar miqyosida 5 nafar Toshkent viloyatidan, Toshkent shahri va Jizzax viloyatlaridan 2 nafardan, shuningdek, Qashqadaryo va Fargʻona viloyatlaridan 1 nafardan shaxs umrbod ozodlikdan mahrum qilingan.

Eslatib oʻtamiz, Oʻzbekistonda 2008-yilning 1-yanvaridan jinoiy jazo turi sifatida oʻlim jazosi bekor qilingan hamda uning oʻrniga umrbod yoki uzoq muddatga ozodlikdan mahrum etish jazosi joriy etilgan.

Bugungi kunda Jinoyat kodeksida faqat 2 ta modda: javobgarlikni ogʻirlashtiradigan holatlarda qasddan odam oʻldirish (97-moddaning ikkinchi qismi) va terrorizm (155-moddaning uchinchi qismi) uchun umrbod ozodlikdan mahrum qilish jazosi belgilangan.

Shuningdek, umrbod ozodlikdan mahrum qilish jazosi – ayolga, oʻn sakkiz yoshga toʻlmasdan jinoyat sodir etgan shaxsga va oltmish yoshdan oshgan erkakka nisbatan tayinlanishi mumkin emas.

Oyina.uzʼni Telegramda oʻqing!