Tasavvuf va tafsir ilmi rivojiga salmoqli hissa qoʻshgan qomusiy olim Al Hakim at-Termiziyning Qurʼon sharhiga bagʻishlangan ilk asari bugungacha “yoʻqolgan” deb kelinar edi.

OʻzAning maʼlum qilishicha, Imom Termiziy xalqaro ilmiy-tadqiqot markazi katta ilmiy xodimi, tarix fanlari boʻyicha falsafa doktori Joʻrabek Choʻtmatovning izlanishlari samarasi oʻlaroq ushbu asar qoʻlyozmasi Turkiyaning Burdur shahridan topildi va u nashrga tayyorlandi.

Dunyo tadqiqotchilari eʼtiboriga havola etish maqsadida asar arab tilida Istanbul shahridagi “Dor al-kutub-arabiyya” nashriyotida “Bahr at-tafsir” (“Tafsir ummoni”) nomi bilan chop etildi. Asarni oʻzbek tilida ham nashr etish koʻzda tutilgan.

Maʼlumot uchun, Al Hakim at-Termiziy (820-932) 400 dan ortiq kitob yozgan boʻlib, ulardan oltmishga yaqini bizgacha yetib kelgan. Allomaning asarlari Parij, Qohira, Damashq, Iskandariya, Istanbul va London kabi shaharlardagi qoʻlyozmalar jamgʻarmalarida saqlanadi.