Toshkent shahrining Yunusobod tumani KXAY – Sharof Rashidov ko'chalari kesishgan chorrahasida 12 ta avtomobil ishtirokida YTH sodir bo‘ldi. Bu haqida Toshkent shahar IIBB YHXB ma’lum qildi.

2023-yil 27-aprel kuni soat 13:40 larda KAMAZ, ISUZU, HOWO, ZIL rusumli yuk avtomashinalari hamda Lacetti, Tracker 2, Nexia 3, Epica, 2 ta Cobalt, 2 ta Spark avtomashinalari ishtirokida yo'l transport hodisasi sodir bo'lgan.

Dastlabki ma'lumotlarga ko'ra, YTH sababi Kamaz rusumli avtoulov haydovchisi chorrahaga yaqinlashayotgan vaqtda tormoz tizimida nosozlik yuzaga kelgan.

Yo‘l transport hodisasi natijasida davlat raqam belgisi 75 X 984 RA bo'lgan Cobalt rusumli avtomashina yo'lovchisi tan jarohat olib, shifoxonaga olib borilib birinchi yordam ko'rsatilgan.

Holat yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda.