Prezident “Germaniya taraqqiyot banki ishtirokida «Kichik va oʻrta biznesni moliyaviy qoʻllab-quvvatlash” loyihasini amalga oshirish chora-tadbirlari toʻgʻrisida»gi qarorni imzoladi. Qarorga koʻra, kichik va oʻrta biznesni qoʻllab-quvvatlash uchun Germaniya taraqqiyot banki (KfW)dan 29,8 mln yevro jalb etiladi.

Loyihaning umumiy qiymati 29,8 mln yevro boʻlib, shundan:

26,8 mln yevro KfWning kreditini;

3,0 mln yevro Loyihani amalga oshirish bilan bogʻliq konsultatsiya xizmatlari uchun KfW grantini tashkil etadi.

Loyiha 2021-2024-yillarda Respublikaning barcha hududlarida amalga oshiriladi. Qishloq xoʻjaligi vazirligi loyihaning oʻz vaqtida va toʻliq amalga oshirilishi, uni muvofiqlashtirish va boshqarish, shuningdek, Loyihani amalga oshirish jarayonida monitoring va hisobotni yuritish uchun masʼul ijro yetuvchi organ etib belgilandi.