Toshkent shahridagi Adiblar xiyobonida Alisher Navoiy tavalludining 582 yilligi munosabati bilan shoir haykali poyiga gul qoʻyish marosimi boʻlib oʻtdi.

Maʼnaviy-maʼrifiy tadbirda ishtirokchilar tomonidan Navoiy ijodi, uning qoldirgan boy maʼnaviy merosi, gʻazallari va ruboiylaridan namunalar oʻqilib, shoir asarlarining dunyo adabiyoti rivojida tutgan oʻrni, ahamiyatiga eʼtibor qaratildi.

Shuningdek, Respublika Maʼnaviyat va maʼrifat markazi, Oʻzbekiston Respublikasi Milliy gvardiyasi hamda Oʻzbekiston davlat drama teatri hamkorligida “Alisher Navoiy va Bobur merosi – beqiyos maʼnaviy xazina” mavzusida maʼnaviy-maʼrifiy tadbiri ham tashkil etildi.

Unda hamkor tashkilotlar masʼul xodimlari, olim va shoirlar, yurtimiz teatr sahnalarida buyuk ajdodlarimiz siymosini yaratgan aktyorlar, Jamoat xavfsizligi universiteti kursantlari hamda Milliy gvardiya Toshkent “Temurbeklar maktabi” oʻquvchilari ishtirok etdi.

Milliy gvardiya Maʼnaviyat va maʼrifat markazida tashkil etilgan mazkur tadbirda maʼruzachilar ulugʻ allomalarimiz qoldirgan boy merosni, ulugʻvor gʻoyalarni oʻrganish barobarida ularni hayotga tatbiq etish hayotimizning asosiy aʼmoliga aylangani, asarlarida yurt obodligi, farovonligi, inson huquqlari, erki, ozodligi, yaxshi yashashi ulugʻlangani, yurtimizda buyuk shoirlarning nomini, boy merosini ulugʻlaydigan, xotirasini abadiylashtirishga xizmat qiladigan ulugʻ ishlar amalga oshirilgani haqida toʻxtalib oʻtdilar.

Tadbir davomida Milliy gvardiya harbiy xizmatchilari, xodimlar, kursantlar va oʻquvchilar oʻrtasida oʻtkazilgan ijodiy ishlar tanlovi gʻoliblari ham munosib taqdirlandi. Oʻzbekiston davlat drama teatri tomonidan Alisher Navoiyning “Sabbai sayyor” asari asosida sahnalashtirilgan spektakl namoyish etildi. Shuningdek, ijodiy ishlar koʻrgazmasi, kursant va oʻquvchilarning sahna koʻrinishlari, xonandalar tomonidan ijro etilgan mumtoz qoʻshiqlar tadbirga oʻzgacha shukuh baxsh etdi.