“Wizz Air” birinchi bor Toshkentga parvozlarni yoʻlga qoʻydi.

Maʼlum qilinishicha, 25-yanvar  kuni mahalliy vaqt bilan soat 10:33 da Vengriyaning “Wizz Air” aviakompaniyasining samolyoti Toshkentga kelib qoʻndi. Airbus A321 neo samolyoti Oʻzbekistonga yangi — Abu-Dabi — Toshkent —   Abu Dabi parvoz yoʻnalishini ochdi. Ekipaj va yoʻlovchilar terminalda tantanali ravishda kutib olindi.

Toʻgʻridan-toʻgʻri muntazam reyslar A320/321 samolyotlarida haftasiga uch marta — dushanba, chorshanba va juma kunlari amalga oshirilishi rejalashtirilgan. Ushbu yoʻnalishdagi chiptalar narxi bir tomonga 45 dollardan boshlanadi.

Eslatib oʻtamiz, 2022-yil dekabr oyidan boshlab “Wizz Air” Samarqand aeroportiga haftasiga ikki marta — seshanba va shanba kunlari parvozlarni amalga oshirib kelmoqda.

Wizz Air — 2003-yilda tashkil etilgan Vengriyaning arzon narxlardagi aviakompaniyasi. 2022-yil iyul holatiga koʻra Wizz Air aviaparki oʻrtacha yoshi 5,3 yil boʻlgan 141 ta Airbus samolyotidan iborat edi.