“Oʻzgidromet” kelayotgan dam olish kunlari qanday ob-havo kuzatilishi haqida maʼlumot berdi.

Qayd etilishicha, bugun, 6-yanvar va dam olish kunlari Oʻzbekistonga Turkmaniston hududlaridan nam va iliq havo massasi kirib kelishi kutilmoqda.

Respublikaning katta qismida yomgʻir yogʻadi, faqat shimoliy va sharqiy hududlarda yogʻingarchilik kutilmaydi.

Bugun kunduzi havo 7-12 daraja iliqqacha, ertaga 10-15 daraja iliqqacha koʻtariladi, yakshanba kuni esa yana 7-12 daraja iliq boʻladi. Baʼzi joylarda shamol 15-20 m/s gacha kuchayadi. Fargʻona vodiysi viloyatlarida kechasi va ertalab tuman tushishi kuzatiladi.

Respublikaning togʻli hududlarida ushbu kunlarda qor koʻchishi xavfi bor.

Avvalroq 9-yanvar kuni Oʻzbekiston hududiga Volgaboʻyi hududlaridan Rossiya Yevropa qismining shimoliy hududlarida shakllangan sovuq havo massasi kirib kelishi boshlanishi haqida xabar berilgandi.