Hukumatning 19-dekabrdagi qarori bilan Toshkentda Maktabgacha taʼlim muassasalari uchun pedagog kadrlarini tayyorlash va ularning malakasini oshirish markazi qurilishi belgilandi. Bu haqda OʻzA xabar berdi.

Taʼkidlanishicha, markaz Koreya hamkorlik agentligi (KOICA)ning umumiy qiymati 12,5 mln dollar boʻlgan grant mablagʻlari hisobidan barpo etiladi. Oʻz navbatida, mazkur mablagʻlar hisobidan poytaxtda innovatsion maktabgacha taʼlim tashkiloti ham qurilishi rejalashtirilgan.

Ushbu ikki obyekt binosini qurish uchun Toshkent shahri Yunusobod tumani Nurafshon va Sharof Rashidov koʻchalari oraligʻida 1,6 gektar yer maydoni ajratiladi.