Oʻzbekiston Respublikasi Oliy sudning Jinoyat ishlari boʻyicha sudlov hayʼati mustabid sovet tuzumi davrida qatagʻon qurboni boʻlgan va hozirgi kunga qadar oqlanmagan 173 nafar oʻzbekistonlikni oqladi.

Respublika ishchi guruhi tomonidan ilmiy-tadqiqot ishlarini amalga oshirish jarayonida aniqlangan, ayrim sabablarga koʻra reabilitatsiya qilinmay qolib ketgan qatagʻon qurbonlari nomlarini oqlash yuzasidan takliflar kiritilgandi.

19-dekabr kuni Oliy sudning Jinoyat ishlari boʻyicha sudlov hayʼatining ochiq sud majlislarida mustabid sovet tuzumi davrida qatagʻon qurboni boʻlgan va hozirgi kunga qadar oqlanmagan 173 nafar shaxsga oid jinoyat ishlari apellyatsiya tartibida koʻrib chiqildi va ularning barchasi oqlandi.

Oliy sudning hukmi bilan reabilitatsiya qilinib, oqlangan qatagʻon qurbonlarining toʻliq roʻyxati bilan ushbu havolada tanishish mumkin.