15-dekabr kuni mahalliy vaqt bilan soat 04:15 da Ozarboyjonning “Azal” aviakompaniyasining samolyoti Fargʻonaga kelib qoʻndi. Bu haqda Uzbekistan Airports xabar bermoqda.

Boku—Fargʻona—Boku yoʻnalishini ochgan Airbus A320 borti anʼanaviy tarzda suv arkasi bilan, ekipaj va yoʻlovchilar esa karnay-surnay sadolari ostida kutib olindi.

Muntazam reyslar haftada bir marta — payshanba kunlari amalga oshirilishi rejalashtirilgan.

Aytish joizki, Fargʻona Ozarboyjon aviatashuvchisi parvoz qila boshlagan Oʻzbekistondagi uchinchi shaharga aylandi. Bokudan Toshkentga reyslar haftasiga ikki marta — payshanba va yakshanba kunlari muntazam ravishda amalga oshiriladi. Bokudan Samarqandga — seshanba va payshanba kunlari.

1992-yilda tashkil etilgan “Ozarboyjon havo yoʻllari” (Azal) yirik aviatashuvchi boʻlib, Boeing va Airbus samolyotlarining zamonaviy parkiga ega boʻlgan, MDH mamlakatlari aviatsiya hamjamiyatida yetakchilardan biri hisoblanadi.