Oʻzbekistonning “Ipoteka-bank” bankini shtab-kvartirasi Vengriyada boʻlgan OTP guruhi sotib oldi. Bu haqda Moliya vazirligi xabar berdi.

Oʻtgan yilning sentyabr oyida imzolangan kelishuv memorandumidan soʻng Toshkent shahrida OTP banki nomidan “Ipoteka-bank” bankini xususiylashtirish boʻyicha oldi-sotdi shartnomasi imzolandi. Hujjatni OTP Bank Boshqaruv raisi va Bosh ijrochi direktori Shandor Chani va Bosh direktor oʻrinbosari Laslo Volf, shuningdek, Oʻzbekiston Respublikasi Moliya vazirligi nomidan Moliya vaziri Timur Ishmetov, Oʻzbekiston Respublikasi nomidan Bosh vazir oʻrinbosari – Investitsiyalar va tashqi savdo vaziri Jamshid Xoʻjayev imzolagan.

Qayd etilishicha, OTP Bank Oʻzbekiston Respublikasi Moliya vazirligiga tegishli 100 foizlik aksiyalarni (aksiyalarning umumiy paketining qariyb 97%) ikki bosqichda sotib oladi: aksiyalarning 75 foizi hozir, qolgan 25 foizini – birinchi bitim moliyaviy yopilganidan uch yil oʻtgach.

“Birinchi bitimning moliyaviy yopilishi 2023-yilning birinchi yarmida amalga oshirilishi kutilmoqda”, deyiladi Moliya vazirligi xabarida.

Aktivlar hajmi boʻyicha “Ipoteka-bank” banki Oʻzbekistondagi beshinchi yirik bank boʻlib, bozor ulushi 8,5%, chakana mijozlari 1,6 milliondan ortiq, mintaqaviy markazlar vazifasini bajaruvchi 39 ta filiali, 193 ta mijozlarga xizmat koʻrsatish shoxobchalari va muhim korporativ mijozlari hisoblanadi. Mahalliy bank sektorining jadal oʻsishiga muvofiq, soʻnggi uch yil ichida bank aktivlari kredit portfeli boʻyicha yiliga oʻrtacha 20% va depozit portfeli boʻyicha 24% ga oʻsgan.

OTP Guruhi Markaziy va Sharqiy Yevropa mintaqasidagi yetakchi moliyaviy guruhlardan biri boʻlib, oʻsish koʻrsatkichlari, ajoyib rentabellik va kapital va likvidlik boʻyicha barqaror mavqega ega. 11 mamlakatda 36000 ga yaqin xodim bilan guruh deyarli 16 million mijozga universal moliyaviy xizmatlarni taqdim etadi. Mintaqaning bank sektoridagi eng faol konsolidator sifatida guruh 2000-yillarning boshidan beri 23 ta bankni sotib oldi va birlashtirdi. Bank hozirda Vengriya, Bolgariya, Serbiya va Chernogoriyada bozor yetakchisi ekani aytiladi. OTP Guruhi shtab-kvartirasi Vengriyada joylashgan. Bank guruhi Budapesht fond birjasida 1995-yildan beri roʻyxatga olingan.