Toshkent shahar Shayxontohur tumanida joylashgan “Ilhom” teatri binosida yongʻin sodir boʻldi. Bu haqda Favqulodda vaziyatlar vazirligi matbuot xizmati xabar berdi.

Maʼlum qilinishicha, 12-dekabr kuni soat 03:34 da Toshkent shahar Shayxontohur tumani “Oʻrda” MFY Paxtakor koʻchasida joylashgan “Ilhom” teatri binosida yongʻin sodir boʻlayotgani toʻgʻrisida shahar FVBga xabar kelib tushgan.

Shunga koʻra, 4 ta yongʻin-qutqaruv ekipaji soat 03:39 da voqea joyiga yetib borib, yongʻin soat 03:58 da qurshab olingan va soat 04:00 da oʻchirilgan.

Yongʻin oqibatida teatr binosining 1-qavat xollining 80 kvadrat metr maydonida ichki qismi va jihozlari yonib zararlangan. Tezkor harakatlar sababli yongʻindan binoning 600 kvadrat metr maydoni saqlab qolingan.

Hodisa oqibatida tan jarohati olgan va halok boʻlganlar yoʻq. Hozirda yongʻin sababi va moddiy zarar miqdori aniqlanmoqda.