Karmana tuman davlat soliq inspeksiyasi bosh inspektori pora olayotgan vaqtda qoʻlga olindi. Bu haqida Iqtisodiy jinoyatlarga qarshi kurashish departamenti matbuot xizmati xabar berdi.

Qayd etilishcha, Karmana tuman DSI bosh inspektori A.Z. “S.” MCHJ rahbari I.P.ga 10 000 AQSH dollari evaziga ushbu MCHJga qarashli kafeda oʻtkazilgan sayyor soliq tekshiruvi boʻyicha moliyaviy jarima qoʻllamaslik va tekshiruv dalolatnomasini uning foydasiga ijobiy hal qilib berishini aytib, 9 000 AQSH dollarini olgan vaqtida ashyoviy dalillar bilan ushlangan.

«Mazkur holat yuzasidan Jinoyat kodeksining 210-moddasi (pora olish) bilan jinoyat ishi qoʻzgʻatilib, tergov harakatlari oʻtkazilmoqda”, deyiladi xabarda.