Ijtimoiy tarmoqlarda Navoiyda maktab direktori va uning oʻrinbosari qorovulxonada qarta oʻynab oʻtirgani aks etgan video tarqaldi. Mazkur holat yuzasidan Navoiy viloyati Xalq taʼlimi boshqarmasi rasmiy munosabat bildirdi.

Qayd etilishicha, tumandagi 52-umumtaʼlim maktabidagi mazkur holat Nurota tumani xalq taʼlimi boʻlimi tomonidan oʻrganib chiqilgan.

“Maktabda oʻquv ishlari, tashkiliy-texnik va kadrlar masalasida oʻziboʻlarchilikka yoʻl qoʻyilgani, ichki tartib-qoidalarga xilof tarzda xatti-harakatlar sodir etilgani aniqlandi. Maktab direktori R.Safarov va uning oʻquv ishlari boʻyicha oʻrinbosari X.Joʻraboyev egallab turgan vazifasidan ozod etildi”, — deyiladi viloyat XTB munosabatida.