Dunyo aholisi soni 8 milliarddan oshdi. Bu haqda BMT hisob-kitoblarida eʼlon qilindi.

Yer aholisi soni 8 milliard kishiga koʻpayishi uchun 12 yil kerak boʻlgan. Insoniyat 8,5 milliard kishilik marradan 2030-yilda oʻtishi kutilmoqda. 2080-yilga borib esa bu raqam 10,4 milliardni tashkil qiladi.

Qayd etilishicha, dunyo aholisining oʻsishi 2100-yilgacha davom etadi.

BMT maʼlumotlariga koʻra, 2050-yilgacha kutilayotgan aholi soni oʻsishi holatlarining katta qismi Afrika davlatlarining hissasiga toʻgʻri keladi. Bular: Kongo Demokratik Respublikasi, Misr, Efiopiya, Nigeriya va Tanzaniya Birlashgan Respublikasi. Shuningdek, Hindiston, Pokiston hamda Filippinda ham bu koʻrsatkich yuqori boʻlishi prognoz qilingan.