“Oʻzgidromet” shoshilinch axborot eʼlon qildi. Unga koʻra, Oʻzbekiston boʻylab 13-noyabrdan 16-noyabrgacha boʻlgan vaqt oraligʻida yogʻingarchilik va noqulay ob-havo kutilmoqda.

Respublika boʻyicha 13–15-noyabr kunlari, shuningdek, shimol hududida, baʼzi joylarda shamol 17–22 metr sekundgacha, Qoraqalpogʻiston va Navoiy, Jizzax viloyatlarining ayrim joylarida 25–28 metr sekundgacha kuchayishi kutilmoqda.

14–16-noyabr kunlari esa Toshkent, Qashqadaryo, Namangan viloyatlarining togʻoldi va togʻli hududlarida yomgʻir yogʻib, qorga aylanishi mumkin, ayrim joylarda kuchli yogʻingarchiliklar kuzatiladi.

Shu bilan birga, togʻoldi va togʻli hududlarda sel-suv toshqin hodisalari yuzaga kelishi mumkin.