Oʻzbekistonning 8 ta oliy taʼlim muassasasi ilk bor top-1000 talikdagi Osiyoning eng kuchli universitetlari roʻyxatiga kiritildi. Bu haqda Oliy va oʻrta maxsus taʼlim vazirligi matbuot xizmati xabar bermoqda.

Quacquarelli Symonds xalqaro reyting tashkiloti Osiyo Universitetlarining 2023-yil uchun reyting (QS Asia University Rankings 2023) natijalarini eʼlon qildi. Unga koʻra, ilk bor Oʻzbekistonning 8 ta oliy taʼlim muassasasi top-1000 talikdagi Osiyoning eng kuchli universitetlari roʻyxatiga kiritildi.

Xalqaro reyting tuzuvchi tashkilot Quacquarelli Symondsʼning bu yilgi reytingi bugungi kunga qadar eng kattasi hisoblanib, oʻz ichiga 760 ta eng kuchli Osiyo universitetlarini qamrab olgan. Shuningdek, reytingni shakllantirishdagi asosiy koʻrsatkichlar sifatida akademik va ish beruvchining obroʻsi, PhD darajasiga ega boʻlgan xodimlar soni hamda xalqaro talabalar ulushi kabi mezonlar birinchi marotaba kiritildi.

QS Asia University 2023 reytingida Osiyo qitʼasidagi universitetlar joylashuviga qarab mintaqaviy oʻrinlari ham belgilangan boʻlib, mamlakatimizning yuqoridagi 8 ta oliy taʼlim muassasasi QS Markaziy Osiyo Universitetlar Reytingida ham munosib oʻrinlarni egalladi.

QS Asia University Rankings reytingini tuzishda OTMning quyidagi 11 ta koʻrsatkichi baholanadi:

ilmiy (akademik) obroʻ (professor-oʻqituvchilarning ovozi) — 30 foiz;

ish beruvchining bahosi — 20 foiz;

professor-oʻqituvchilar/talabalar nisbati — 10 foiz;

xalqaro tadqiqot tarmogʻi (Scopusʼdagi maqolalar soni) — 10 foiz;

bitta maqolaga berilgan iqtiboslar — 10 foiz;

har bir professor-oʻqituvchi hissasiga toʻgʻri keladigan maqolalar soni — 5 foiz;

PhD darajasiga ega xodimlar soni — 5 foiz;

xalqaro professor-oʻqituvchilarning ulushi — 2,5 foiz;

chet ellik talabalarning ulushi — 2,5 foiz;

almashinuv dasturlari doirasida xorijdan kelgan talabalarning ulushi — 2,5 foiz;

xorijga borgan talabalarining ulushi — 2,5 foiz.