Samarqand shahridagi ayrim koʻchalarda tramvay va avtobuslar harakatida oʻzgarishlar kuzatiladi. Bu haqda Samarqand IIB xabar berdi.

Maʼlum qilinishicha, Turkiy davlatlar tashkilotining sammiti oʻtkazilishi munosabati bilan 2022-yilning 10-11-noyabr kunlari Samarqand shahridagi Ibn Sino, Boʻstonsaroy, Universitet xiyoboni, Namozgoh, Sadriddin Ayniy, Registon, Rudakiy, Shohizinda, Usto Umar Joʻraqulov, Islom Karimov, Afrosiyob, Beruniy, Mirzo Ulugʻbek, Gulobod, Muqimiy va Dahbed koʻchalarida transport vositalarining harakati vaqti-vaqti bilan cheklanadi.

Shu munosabat bilan mazkur koʻchalarda yoʻlovchilarga xizmat koʻrsatuvchi avtobus va tramvaylar harakatida ham vaqti-vaqti bilan toʻxtalishlar boʻladi yoki yondosh koʻchalar orqali tashuvlar amalga oshiriladi.