7-noyabr dushanba kuni Toshkent xalqaro aeroportida noqulay ob-havo sharoiti tufayli Uzbekistan Airways milliy aviakompaniyasining bir nechta reyslarni muqobil aeroportlarga yoʻnaltirishga majbur boʻldi, deb xabar berdi kompaniya matbuot xizmati.

Xususan, HY602 Moskva — Toshkent qatnovi Navoiy aeroportiga, HY336 Jidda — Toshkent qatnovi Samarqand aeroportiga yoʻnaltirildi. Ushbu yoʻnalishdagi qatnovlar belgilangan manzilga yetib bordi.

Bundan tashqari, Fargʻona xalqaro aeroportida noqulay ob-havo sharoiti tufayli rejalashtirilgan HY081 Toshkent — Fargʻona reysi soat 06:55 dan 09:30 ga koʻchirildi. HY277 Fargʻona — Istanbul reysi Fargʻona xalqaro aeroportidan oʻz yoʻnalishi boʻyicha joʻnab ketdi.

“Shu munosabat bilan, HY278 Istanbul — Fargʻona va HY082 Fargʻona — Toshkent reyslari kechikib amalga oshirilishini maʼlum qilamiz”, — deyiladi xabarda.

Aeroporti matbuot xizmati muqobil aerodromga yoʻnaltirishga majbur boʻlingan boshqa aviakompaniyalarning samolyotlari haqida ham maʼlumot berdi.

Qayd etilishicha, Rossiyaning Azimut aviakompaniyasining Mineralniye Vodi – Toshkent yoʻnalishi boʻyicha AZ0681 reysi ob-havo sharoiti, hususan kuchli shamol va koʻrish imkoniyatining pastligi tufayli Navoiy aeroportiga joʻnatildi.

Bortida 91 yoʻlovchi boʻlgan Sukhoi Superjet 100−95B samolyoti mahalliy vaqt bilan soat 12:19 da Navoiy xalqaro aeroportiga qoʻndi. Ob-havo yaxshilangach, samolyot soat 13:23 da qayta Toshkentga uchib ketdi.

Shuningdek, bugun soat 05:42 da ob-havo sharoiti tufayli Uzbekistan Airways aviakompaniyasining HY602 Moskva — Toshkent reysini amalga oshirayotgan Boeing 787−8 Dreamliner samolyoti Navoiy aeroportiga borib qoʻndi. Biroz vaqat oʻtgach, ob-havo sharoiti yaxshilangandan soʻng bortida 226 yoʻlovchi boʻlgan samolyot Toshkent aeroportiga ucha oldi.