Xabaringiz bor, Respublika Maʼnaviyat va maʼrifat markazi Yoshlar ishlari agentligi va boshqa hamkor tashkilotlar bilan birga “Fidoyi yoshlar yetakchisi” respublika koʻrik-tanlovini oʻtkazmoqda.

“Fidoyi yoshlar yetakchisi” koʻrik-tanlovi uch bosqichda: tuman-shahar, viloyat va respublika miqyosida tashkil etiladi. Hududlardan saralanib kelgan ishtirokchilar kecha va bugun respublika bosqichida belgilangan 4 ta shart boʻyicha oʻzaro bellashyaptilar.

– Ushbu tanlovni oʻtkazishdan asosiy maqsad mahallalarda yoshlar muammolari va takliflarini oʻrganish, ularga koʻmaklashish borasidagi ishlar sifatini koʻtarish, yoshlar yetakchilarining bilim va malakasini oshirish orqali ijtimoiy-maʼnaviy muhit rivojiga hissa qoʻshishdan iborat, – deydi Respublika Maʼnaviyat va maʼrifat markazi masʼuli xodimi Pardaxol Norqobilova.

Bugun, 28-oktabr kuni poytaxtimizdagi Yoshlar ijod saroyida koʻrik-tanlovning respublika bosqichi gʻoliblarini taqdirlash marosimi boʻlib oʻtadi.