Toshkent—Andijon va Toshkent—Samarqand pulli avtomobil yoʻllari 2026-yilgacha qurib bitkaziladi. Bu haqda Davlat-xususiy sheriklikni rivojlantirish agentligi direktori Zokir Bozorov maʼlum qildi.

Qayd etilishicha, 2022—2026-yillarda transport sohasida amalga oshirilishi rejalashtirilgan 5 ta yirik loyiha boʻyicha hujjatlar tayyorlash va oʻrganish ishlari davom etmoqda.

Bular:

Jahon banki maslahat koʻmagida amalga oshirilayotgan Toshkent—Andijon pullik avtomobil yoʻlini qurish loyihasi;

Yevropa tiklanish va taraqqiyot banki maslahat koʻmagida amalga oshirilayotgan Toshkent—Samarqand pullik avtomobil yoʻlini qurish loyihasi;

Samarqand va Shahrisabz shaharlari orasida 66 kmlik avtomobil yoʻli va Taxtaqoracha dovonida 4,4 kmlik tunnel qurish loyihasi.

Transport sohasida 2019—2022-yillar davomida 7 ta loyihani amalga oshirish boʻyicha ishlar olib borilayotgan boʻlib, shundan 2 ta loyiha boʻyicha DXSH bitimi imzolangan.

Maʼlumot uchun, Oʻzbekistondagi ilk pulli yoʻllarning qurilishi haqida 2018-yilda maʼlum qilingan. Oʻshanda bu kabi yoʻllarning birinchisini qurish bilan Germaniyaning GP Günter Papenburg kompaniyasi shugʻullanishi mumkinligi aytilgandi. 2019-yilda Avtomobil yoʻllari qoʻmitasi Oʻzbekistondagi ilk pulli trassani qurish uchun joy tanlanayotganini maʼlum qilgandi.