Oʻzbekiston Respublikasi Prezidenti Shavkat Mirziyoyev Qozogʻiston Respublikasi Prezidenti Qasim-Jomart Toqayevning taklifiga binoan 12-14-oktyabr kunlari Osiyoda hamkorlik va ishonch choralari boʻyicha kengash hamda Mustaqil Davlatlar Hamdoʻstligi Davlat rahbarlari kengashining navbatdagi majlislarida ishtirok etish uchun tashrif bilan Qozogʻiston poytaxti Ostona shahrida boʻladi.

13-oktyabr kuni boʻlib oʻtadigan yuqori darajadagi xalqaro forum – Osiyoda hamkorlik va ishonch choralari boʻyicha kengash sammitida qitʼamizda xavfsizlik va barqaror taraqqiyotni taʼminlashning dolzarb masalalari koʻrib chiqiladi.

14-oktyabr kuniga rejalashtirilgan MDH mamlakatlari yetakchilarining uchrashuvida koʻp tomonlama sheriklikning eng muhim jihatlari va amaliy hamkorlikni kengaytirish istiqbollarini muhokama qilish koʻzda tutilgan.

Boʻlajak tadbirlarda alohida eʼtibor oʻzaro savdoni koʻpaytirish va sanoat kooperatsiyasi loyihalarini ilgari surish, samarali transport kommunikatsiyalarini shakllantirish, oziq-ovqat xavfsizligini taʼminlash va iqlim oʻzgarishiga qarshi kurashish masalalariga qaratiladi.

Bundan tashqari, sammitlar doirasida Oʻzbekiston Prezidenti hamkor mamlakatlar delegatsiyalari rahbarlari bilan ikki tomonlama uchrashuvlar va koʻp tomonlama muzokaralar oʻtkazadi.