Samarqand viloyati Qoʻshrabot tumanida tabiiy resurslardan noqonuniy foydalangan MCHJ aniqlandi, deya xabar bermoqda Iqtisodiy jinoyatlarga qarshi kurashish departamenti matbuot xizmati.

Departamentning Qoʻshrabot tuman boʻlimi tomonidan oʻtkazilgan tergovga qadar tekshiruvda “M.I.” MCHJ rahbari Sh.H. oʻzboshimchalik bilan oʻzi tomonidan sotib olingan transformatorni oʻrnatib, noqonuniy ravishda 63 dona mayner uskunalari va ikki dona suv nasoslaridan foydalanib kelgani aniqlandi.

Oqibatda davlat va jamiyat manfaatlariga 1,1 mlrd soʻm zarar yetkazilgani maʼlum boʻldi.

Holat yuzasidan Jinoyat kodeksining 185−2-moddasi (Elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qoʻzgʻatilib, tergov harakatlari oʻtkazilmoqda.