Шанхай ҳамкорлик ташкилоти Самарқанд саммитида иштирок этиш учун Тожикистон, Туркманистон, Қирғиз Республикаси, Хитой Халқ Республикаси давлат раҳбарлари мамлакатимизга келишди.

14 сентябрь куни етиб келган Қирғиз Республикаси Президенти Садир Жапаровни Самарқанд халқаро аэропортида Ўзбекистон Республикаси Бош вазири Абдулла Арипов ва бошқа расмий шахслар кутиб олди. Олий мартабали меҳмон Ҳазрати Хизр мажмуасида Ўзбекистоннинг Биринчи Президенти Ислом Каримов қабрига гул қўйиб, унинг хотирасига ҳурмат бажо келтирди.

Шунингдек, 14 сентябрь куни кечга Ўзбекистон Республикаси Президенти Шавкат Мирзиёевнинг таклифига биноан Хитой Халқ Республикаси Раиси Си Цзиньпин давлат ташрифи билан мамлакатимизга келди. Самарқанд халқаро аэропортида Хитой етакчисини давлатимиз раҳбари кутиб олди. Кутиб олиш маросимида миллий куй-қўшиқлар, рақслар ижро этилди. Ташрифнинг асосий тадбирлари 15 сентябрь кунига мўлжалланган бўлиб, бугун олий даражадаги Ўзбекистон-Хитой музокаралари бўлиб ўтади.

Тожикистон Республикаси Президенти Эмомали Раҳмон бугун – 15 сентябрь куни Шанхай ҳамкорлик ташкилоти Давлат раҳбарлари кенгаши мажлисида иштирок этиш учун Самарқанд шаҳрига келди. Халқаро аэропортда олий мартабали меҳмонни Ўзбекистон Республикаси Бош вазири Абдулла Арипов ва бошқа расмий шахслар кутиб олди. Тожикистон раҳбари ҳам Ҳазрати Хизр ёдгорлик мажмуасига ташриф буюриб, Биринчи Президентимиз Ислом Каримов қабрига гул қўйди.

Шунингдек, бугун Ўзбекистон Республикаси Президенти Шавкат Мирзиёевнинг таклифига биноан Туркманистон Президенти Сердар Бердимуҳамедов Шанхай ҳамкорлик ташкилоти Давлат раҳбарлари кенгаши мажлисида фахрий меҳмон сифатида иштирок этиш учун мамлакатимизга келди.

Аэропортда олий мартабали меҳмонни Ўзбекистон Республикаси Бош вазири Абдулла Арипов ва бошқа расмий шахслар кутиб олди. Ташриф дастурида Сердар Бердимуҳамедов Ҳазрати Хизр мажмуасига ташриф буюриб, Биринчи Президентимиз Ислом Каримов хотирасига ҳурмат бажо келтириши кўзда тутилган.