Oyina.uz портали Ўзбекистон Республикаси Давлат мустақиллигининг 31 йиллиги муносабати билан ютуқли викторина ўтказганидан хабарингиз бор. Икки босқичда бўлиб ўтган онлайн викторинада Шохижаҳон Урунов (1-ўрин, 19 та тўғри жавоб, 7 минут 52 секунд), Нодир Авазов (2-ўрин, 19 та тўғри жавоб, 9 минут 21 секунд) ва Бобурбек Латипов (3-ўрин,17 та тўғри жавоб, 6 минут 25 секунд) ғолибликни қўлга киритди.

Республика Маънавият ва маърифат марказида ғолибларни тақдирлаш маросими бўлиб ўтди. Марказ раҳбари Минҳожиддин Ҳожиматов уларни табриклаб, совринларни топширди.

Шохижаҳон Урунов,

1-ўрин соҳиби:

– Бухоро давлат Педaгогика институти тарих йўналиши 2-босқич талабасиман. Викторина ҳақида хабар топганимдан кейин иккиланмай яқинларим, танишларимга таклиф ҳаволасини юбора бошладим. Биринчи босқичда юқори 100 таликка киргач, саволлар қийин бўлмасмикан, деб ўйланиб қолдим. Ватанимиз тарихидан яхши хабардорлигим ва oyina.uzʹда бериладиган мақолаларни доимий ўқиб борганим тест ечишда асқатди.

Натижалар эълон қилингач, рости, ишонмадим. Уйдагиларга айтсам, улар ҳам ишонқирамай қарашди. Кейинги вақтларда “Қайсидир акцияда ғолиб бўлдингиз”, деб ҳавола юбориб, фирибгарлик қилаётганлар ҳам кўпайган-да. Менга oyina.uz порталидан алоқага чиқишганидан сўнг яқинларим ғолиблик билан табриклади.

Танлов фақатгина таваккалчиликка, масалан, “рандом” каби дастурларда тасодифий ғолиб танлашга эмас, балки билим билан ғалаба қозонишга асослангани жудаям ёқди. Назаримда, ўйинлар шундай ўтказилса тўғри ва ҳалол бўлади. Oyina.uzʹга ва барча ўқувчиларига омад тилайман!

Бобурбек Латипов,

3-ўрин соҳиби:

– Oyina.uzʹни доимий кузатиб бораман. Айниқса, тарих, тил ва таълим йўналишидаги мақолаларни бошқа манбаларда учратмаганим боис мазза қилиб ўқийман. Викторинада ғолиб бўлганимни билгач, жуда қувондим. Аввал-бошидаёқ танловда асосий масалани билим ҳал қилишини англагач, совринли ўринлардан бирини эгаллашни ният қилгандим. Киши бир нарсага қаттиқ киришса, ҳаракат қилса ва илм эгалласа, мақсадига эришишига яна бир марта амин бўлдим. Танлов мутасаддиларига, Oyina.uz портали ижодий жамоасига адолатли викторина учун раҳмат!