Хоразм вилоятида 2 та шаҳар ва 5 та туман ҳокимлари ҳайфсан жазосини олди. Бу вилоят ҳокимининг 23 август кунги фармойишида белгиланган.

Вилоят ҳокими фармойишига кўра, фаолияти давомида «Бозор тамойилларига асосланган ипотека кредитлари ажратиш орқали аҳолининг уй-жой билан таъминлашга оид қўшимча чора-тадбирлари тўғрисида»ги Преиздент фармони ижросини белгиланган муддатда таъминламасдан масъулиятсизликка йўл қўйгани, уй-жой сотиб олиш учун ижобий хулоса олган 92 нафар фуқарога амалий ёрдам бермагани, август ойида субсидия ажратиш муддати ўтиб кетишига йўл қўйгани учун, Меҳнат кодексининг 181-моддаси 2-бандига асосан:

– Урганч шаҳар ҳокими Холбоев Ойбек Мадаминовичга;

– Хива шаҳар ҳокими Давлетов Темур Исмоиловичга;

– Боғот тумани ҳокими Яхшибаев Шавкат Қурамбаевичга;

– Ҳазорасп тумани ҳокими Машарипов Уктам Рустамовичга;

– Урганч тумани ҳокими Шарипов Фрунзе Илхомовичга;

– Тупроққалъа тумани ҳокими Салаев Алишер Рўзметовичга;

– Янгиариқ тумани ҳокими вазифасини бажарувчи Давлетов Анвар Кенжаевичларга “Ҳайфсан” интизомий жазо чораси қўлланган.

Бундан ташқари, ҳокимнинг бошқа бир фармойишига кўра, Хоразм вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари-вилоят иқтисодий тараққиёт ва камбағалликни қисқартириш бош бошқармаси бошлиғи Ачилов Муроджон Азаматовичга ҳам ҳайфсан интизомий жазо чораси қўлланган.